يا بلدي
يا بلدي
يا فرس رامح
طريقك فين ؟
دا يوم واضح وضوح الشمس
ويوم أبداً ماهوش واضح
انا ناسي فاتوني وحيد
دموع عيني على خدي وقلبي كسير
لكنه برغم طول الحزن بيسامح
منيش أحسن من اللي ضحوا على شانك
بكل عزيز
ولد ضاع منه ضيا عينه
وبنت دمها سايح
وكله قبلي بيسامح
يا بلدي يا فرس جامح
طريقنا عسير
يا ريت نثبت على حبك
ويبقى همنا بكرة مش إمبارح
ونصدق في وعودنا لبعض
نفكر بس فيكي إنتي
وننسى الفرد
ونحسب صح
ده مش بالقلب وحده الحب
لازم بالعقل ويا القلب
يا بلدي يا فرس طالح
يسايسك مين ؟
وكل الساسة
يا فاسدين
يا مش فاهمين
***
يا بلدي يا فرس أسمر ، أنا ضامنك
برغم الليل ورغم البرد سوا حنعدي كل الصعب
برغم اللي اهانونا وحاولوا كتير يذلونا
وخانوا الود
حيطلع فجرنا الأبيض
ومن تاني
حينبت في الصحاري الورد
___
إيهاب لُطَيِّف
مونتريال
------------------------------
78 Lashes
No comments:
Post a Comment