عن قنا ...قبل ما تحكم علينا لازم تقرا المقال ده

by Nada Nashat on Thursday, April 21, 2011 at 8:11am

الناس دلوقتي عندها حالة لخبطة من اللي بيحصل في قنا ...يا جماعة دي فتنة طائفية و لا ايه ؟ طب لو فتنة فين المواطنة اللي بنقول عليها و اين حقوق الاقباط و الكلام اللطيف ده كله ...و لو مش فتنة طب ايه بقى هو ايه اللي حاصل و احنا كده مش فاهمين حاجة ....هنا اقولكوا عندكوا حق متفهموش الموضوع معقد فعلا و معلش استحملوني شوية انا حشرحوا و على فكرة انا من قنا

 الجزء 0 (المجتمع): قنا عبارة عن قبائل ..يعني كل مجموعة عائلات تنتمي لقبيلة معينة زي الاشراف، الهوارة (ايوه اللي بيطلعوا في المسلسلات) ، الامارة ، العرب و قبائل تاني كتير ...كل قبيلة تقدر تجيب تاريخها من 1000 سنة و كل واحد بيتباهى بقبيلته ... و يوم ما بتحصل مشاكل ما بين قبيلتين البلد بتقلب مجزرة ...احنا كدة ،كرامتنا على طرف مناخيرنا و محدش بيستحمل اي شبهة غلط فيه او عيلته او قبيلته - مع الاحترام الكامل من الجميع لكبار القبائل طبعا مفيهاش اي جدال

الجزء 0 (الدين ): هنا الدين ليه احترام خاص ...يعني الناس مش سلفية و لا صوفية ، كل واحد جواه حتة سلفية شديدة لكن احترام الاولياء و عبدالرحيم القناوي بالذات ده علاقة خاصة تقدر تقول اننا هنا عندنا مذهب خاص بينا...كلمة القسيس او الراهب تمشي غلى الكل مسلم او مسيحي و في القرى و المراكز بالذات الراهب المسلمين يبوسوا ايديه قبل المسيحيين و يطمن على المسلمين قبل المسيحيين 

   الجزء الاول: من تقريبا 15 سنة، قنا المدينة و العاصمة كانت عبارة عن قرية كبيرة ، مفيش خدمات - مفيش وسائل ترفيه - مفيش اهتمام - مفيش مفيش مفيش و بعدين جالنا عادل لبيب اللي قلب كيان البلد 180 درجة و يا ما قنا اخدت جوايز عالمية بسبب اللي عمله و ياما الاعلام اهتم لحد ما اتشال من تقريبا 6 سنين

الجزس التاني: قنا اول محافظة في مصر اللي محافظها يبقي قبطي (خلي بالكوا احنا كنا متعودين على اللواءات محافظين) البلد استقبلته زي اي محافظ جه بالزفة الصعيدي ..الكل تخيل ان مجدي ايوب حيكمل على اللي عمله عادل لبيب و حيحسن الحاجات اللي كانت بتضايق الناس من عادل لبيب ....لكن اللي حصل كان العكس - اهمال تام ، عودة مراكز القوى المتمثلة في كبار بعض القبائل اللي معتبرينها بتاعتهم ، نسبة البطالة عليت تاني ،الزبالة في كل حتة ، من الاخر البلد بقت ترجع لورا و بسرعة الصاروخ

جزء الثورة: لما قامت الثورة كان فيه غضب رهيب من المحافظ و الناس كانت حتعتصم عشان تشيله بس الجيش قالهم حيتشال حيتشال  - (على فكرة قنا من المحافظات اللي كان فيها مظاهرات اخر ايام الثورة بس محدش جاب سيرتهم)

الجزء الثالث: مجدي ايوب اتشال ، و انباء عن تولي محافظ جديد لقنا مع التغيرات اللي حاصلة ...مين يا جماعة؟ اللواء عماد ميخائيل اللي سبحان الله لواء و مسيحي و الوحيييييد اللى مسك محافظة و اللي كانت قنا للمرة التانية

 اعتراضات الناس: اشمعنى قنا اللي يتجاب فيها لواء قبطي تاني و التجربة اللي فاتت اثبتت فشلها بكل المقاييس - احنا مش حقل تجارب -ما يعينوا 5 او 6 لواءات مسيحيين تاني في حتت تانية ولا هو عند و خلاص (الاعتراض من المسلميو المسيحيين على حد سواء) - يا جماعة احنا مجتمع قبلي حيخاف يتدخل زي اللي فات ....

طب ايه بقى موضوع الفتنة الطائفية ؟؟ حصل من تاني او تالت اليوم الجماعات السلفية بدأت تنتهز غضب الناس لمصالحها و بدأت فتاوى تتطلع ان المسيحي لا يجوز محافظ و احنا دولة اسلامية و كلام كتير محدش عارف مين جابوه و شوية قالوه قنا امارة اسلامية و البيعة حنديها لفلان و الكلام مش اشاعات ده حصل فعلا بس الناس اللي في قنا هما اللي وقفلهوم و الناس اللي في الشارع معترضين على كلام السلفيين لكن السلفيين هما اللي صوتهم عالي

طب ليه قطعوا الطريق؟ عشان محدش بيعبر محافظات الجنوب و كأننا مش من البلد دي و لا عمر حد كان فكر ينزل كاميرا واجدة  الشارع لو الناس معملتش حاجة تلفت انتباه الحكومة و لا عمر مطالب الناس كانت حتتناقش او تستجاب من غير اللي حصل - لو ربع الاعتصام اللي قنا عملته كان حصل في القاهرة او الاسكندرية او الاقصر كانت الحكومة نفذت المطالب من غير نقاش و الجملة الاشهر "خلاص غيروا خانة الجنسية لمصري درجة تالتة او صعيدي لو شايفنا اقل منكم" و ده احساس الناس في الشارع

قنا مش جهلة ..البلد اللي شبابها يردد الشعر مع الشعراء لما يجيوا ميبقاش جاهل ..والشعب اللي يقف لكرامته ميبقاش جاهل ..و الشعب اللي فيه كل الصفات دي بس عمل حاجة غلط يبقى شعب محتاج وعي مش الناس تنفضله و تتهمهم بالهمجية و الطائفية ...و الموضوع دلوقتي قلب كرامة (احنا مش اقل من بتوع القاهرة ) ....قبل ما تحكموا على مجتمع قنا يا ريت تعرفوا اللي حصل فيه الاول عشان لا تتهموهم بما ليس فيهم

معلش طولت عليكم